粒粒脆

南乳花生肉，相傳由清未“盲公德”所創。他把花生仁用南乳醬水泡浸一夜，涼幹。然後用大鐵鍋內裝大粒黃砂和花生仁一起炒熟，即成粒粒脆的南乳花生肉了。 ^[1] 

南乳肉一般系散賣，用個大玻璃缸裝住。老竇做細路嗰個年代，系用舊新聞紙折成雪糕筒裝包南乳肉，計價單位為一豪子一筒，大概有廿零卅粒。我做小學生嗰陣呢，就五豪子或一蚊一袋，用塑料袋裝嘅。得到一包南乳肉，我哋都會先對住袋花生吹幾口氣，松薄嘅花生衣就會隨風飄起。呢個做法，一嚟系孩童玩意，睇住花生衣飛起覺得好好玩；二嚟花生衣會黐喉嚨，一般唔食。我同同學最鐘意就係上課偷食南乳肉，因為佢細細粒，手捻一粒，喺老師眼皮底都可以迅速放入口。又因為南乳肉好脆，食起嚟會發出“咯咯”聲，所以我哋都會將花生含到軟熟啲先慢慢咬。而老竇則系整蠱戲院門前嘅南乳肉盲眼阿伯，用假銀紙買南乳肉，試下阿伯系真盲定系假盲。阿伯每次收到假銀紙，都會順手攞起盲公竹失驚冇神向細路大力打去，成班細路就會一鬨而散。

話説我哋屋企以前炸南乳蛋散，用南乳搓粉，出品系就係有南乳味，但就紅黐黐，唔好睇。後嚟有人過招，話拍爛蒜頭浸鹽水，搓入粉中，蛋散就會有南乳味。果然如此。南乳肉嘅“南乳”味，到底系出自真南乳，定系蒜頭開鹽水呢？噉我就唔知嘞。